لقد فهمت مشاكلنا و مشاغلنا في فترة حساسة مازلنا ما فقناش فيها من وجيعة وفاة ميسم الزوجة الشابة الله يرحمها الي ترزات في شبابها و شابوا اولادها من الفاجعة و الكارثة الي هبطت عليهم رغم صغير سنهم
مازالت عينها حية الله يرحمها و
مازال صوتها وهي تستغيث و تطلب النجدة ما تنساش من جيرانها و أهلها
مازالوا صغارها ما فهموش معنى الموت
مازالت قلوبنا دامية و مازلنا ما حددناش الاسباب و رسمنا الحلول و قررنا آش نعمل باش تاقف الجرائم ضد النساء و الاطفال و الشابات
شكرا لك اختصرت علينا مشقة التفكير و التمحيص و البحث و التعمق و انجاز الدراسات و المقارنات باش نلقى الحلول لمشاكل بلادنا الاقتصادية و الاجتماعية و التنموية و الثقافية و الحقوقية و المؤساساتية و حتى تداعيات التحولات الجيوسياسية في العالم علينا و نتائج الانتخابات الجديدة في اوروبا و امريكا و غيرها علينا و على علاقاتنا الخارجية و غيرها من الملفات الهامة و الشانطي الكبير الي واحلين فيه
و انا أقترح أن يصدّر مقترحك للعالم بأسره لما له من أهمية
شكرا لك لأنك أرحتنا من مشقة البحث عن أسباب ضعفنا و عجزنا و وهننا و عقمنا و فقرنا الفكري و حتى غياب بعض ممثلينا عن واقعهم و خروجهم عن المنطق و الذوق قبل القانون
فعلا تعدد الزوجات و الزواج بأربعة من شأنه حل كل مشاكلنا و لعله يفتح المجال لايقاف الحروب الدائرة في الشرق الاوسط و اوروبا غيرها من البقاع في العالم
و ربي يقدر الخير
راضية الجربي ، رئيسة الإتحاد الوطني للمرأة التونسية