أنا هكاكه متكي على البنك… موش بنك فلوس بنك لوح من عام ككح قريب يطيح بي حتى سمعت الباب يدڤ بالقوي تقولش عليه واحد شاد ايد مهراس ويدڤ… خرجت نجري مفجوع نلڤاه هاك المنجوه الكوني ولد عمتي حال كشخته يضحك كأنه ترا شكون يدغدغ فيه… خزرتلة وڤتله « شبي يخذتك باش تكسر الباب يا مستّك؟ خزرلي وڤال » جيت نڤلك راني شريت شڤّاڤة باش نحط فيها كل يوم ما كتب ربي باش نعاون الحكومة سخفتني والله وهكاكه نكونوا عاوناهم في توفير موارد الميزانية والله عمل خيري وفيه أجر كبير شبيك ما تعملش حتى انت شڤاڤة خلي نعاونوها حكومتنا والله وجعني ڤلبي كي سمعت بالميضوع على التكتك… التشيك توك سامحني!! » احنا هكاكه وولد الكوني الصغير الكيلاني مبابي جاء يجري ويصيح « بابا بابا… راهي أمي كسرت الشڤّاڤة متاح الحكومة باش تشري خبزتين ورطل بشماط وكي ڤلتلها « هذيكه شڤّاڤة الحكومة تو نشكي بيك لبابا » ڤاتلي » بطني قبل وطني تو تنفعني الحكومة متاعك!!! » خزرله الكوني وڤاله » وانت اش ڤلتلها يا فزغول موش ڤتلك عس على شڤّاڤة الحكومة؟؟ » ڤاله وهو ينغنغ وريڤته شرتله » ڤلتلها حليلك من ربّي.. لا لا ڤلتلها حليلك مالحكومة…لا لا حليلك من بابا… يخي عطتني شلبوق وزادتني فكّة على زماحتي…لتوه توزوز… اححححححيييت… » وسقط مغشيا عليه… خزرلي الكوني ولد عمتي وڤالي » شنوة رايك ولد خالي نعملوا شڤّاڤة مشتركه ندسّوا فيها فلوس للحكومة وتخليها هنا عندك باش ما تكسرهاش هااااك المنجوهة عندي… اش ڤلت؟؟ » خزرتلة وانا ندوّح في راسي وڤتله » برّه العب بعيد… كل واحد وشڤّاڤته… تحبني نعسلك على شڤّاڤتك . برّه العب بعيد…كل واحد يعس على شڤّاڤته والشقف متاعه
سلامة حجازي