السيدة وزيرة المالية تحب التوانسه يحطو يديهم في جيوبهم ويعاونو بلادهم والا يُعتبروا ماهمش قايميين بالواجب نتاعهم
يبدو ان السيده وزيرة المالية نسات الي أغلبية التوانسة ما عاد عندهم مايعطيو بعد ما كلاتهم الجباية وغلاه المعيشة والمشاكل اليومية الي ماعادش قادرين يحلوها (نسبة الادخار الرسمية من أضعف ما ثمه)
حتى التوانسه المنتمين لمنظومة الاقتصاد الموازي، باش يخرّجوا فلوسهم علاه سيدتي الوزيرة؟
ثمه مشاريع كبرى حطيتوها للعموم باش ينخرطوا فاها؟ شنوه باش تعطييوهم في مقابل فلوسهم المخبية وتحبهم يطلعوها للعلن؟ وهل المناخ الي يعيشوا فيه حاليا مؤهل باش يخرجوا فلوسهم ويستثمروا؟ الإدارة تصلحت؟ البيروقراطية تنحات؟ الرشوة وفات؟ وشنوه الضامن انو ما يتشدوش بتهم تبييض أموال او تمويل ارهاب وقت يحطوا يديهم في جيوبهم؟ وكي يخسروا فلوسهم زعمه شنوهً باش تعملولهم؟ ترجعولهم فلوسهم اوً حتى جزء منو؟
سيدتي الوزيرة، إذا التوانسه مقتنعين بمشروع رقي ونهضة ببلادنا ويشوفو في رؤية واضحة ويعرفوا بالضبط وين ماشين وحاسيين الي ثمة إراده قوية تحب تقضى عالحيف واللاعدالة واللامساواة الموجودين ومقتنعين بانو الناس الي عندها الدمان تحب تصلح وتقدم على أسس صحيحة، الفلوس تجي او تطلع وحدها
ساهلة المعادلة سيدتي
أرام بلحاج ، أستاذ جامعي وباحث في كلية الإقتصاد بنابل