صباح الوطن
14 جانفي 2011… نهار كبير… تاريخ ما ينجّم حدّ يفسّخو… كل لحظة محفورة في أجسادنا… مغروسة في ذاكرتنا… ما فمّاش علاش باش نحتفلو صحيح… آما 
يبقى 14 جانفي يوم العزّة والإنتصار والتحرر… سرقولنا ثورتنا… لازم يجي نهار ويرجع المسروق لإماليه… اغتصبوا حلمتنا… ما زلنا نحلموا حتى وسط الضباب والخيانات… قصّوا فرحتنا… لازم تزهى الأيام بعد النكد والغصّة… مانيش نادمة ومانيش باش نبكي ومانيش باش ندبرم على خاطر المتربصين بتونس هذا آش يتمنّاو… اليوم بكلّ شموخ نصيح … تونسية ونصف وأفتخر… تونسية ونصف ولآخر نفس باش نقاوم… تونسية وعاشقة في البلاد رغم كلّ شيّ… تونسية الإسم… تونسية الهوية… تونسية العلم… تونسية الهواء… تونسية الماضي والحاضر والمستقبل… تونسية البحر والجبال… تونسية العطر والألوان… تونسية الزمان والمكان… تونسية الروح والوجدان… تونسية التمرّد والعصيان.. تونسية الأمل رغم الأحزان…
تحيا تونس
ليلى طوبال