يا يوسف. نعرف اللي كلامي ما يروقلكش امّا اصبر واتحمّل كلامي : نقلّك شوف قبل فوات الأوان المنصف المرزوقي كيف لوحتو النهضة دخل وخرج في الحلّة.. ويدور كيف الفرططّو على الأنبوبة… وشوف الباجي بعد ما باعنا وسخر منّا كيفاه تحالفت معاه النهضة وهو لحم رماتو من بعد عظم.. واليوم أقصى ما نقدرو عليه هو أنّنا نقولو ربّي يخفّف عليه الهمّ… وشوف بن جعفر بعد ما ركب عليه الغنوشي هشّملو عظيماتو وخلاّه حتى كيف يتكلّم ما يجمعش جملتين مع بعضهم.. نقلك هالكلام لأنّك ما زلت صغير والعمر قدّامك طويييل.. ما تحرقوش من اليوم يعيش ولدي.. راهو اللي أكبر منّك بليلة أزيد منّك بحيلة.. ما تحرقش التاريخ النضالي للمرحومة راضية الحدّاد.. راهي كانت جات حيّة يستحيل تخلّيك تترمى في أحضانهم.. وأحنا من موقعنا النضالي ووفاء للمناضلة من واجبنا نبهوك.. ونقولولك فيق.. فيق قبل ما يحرقلك التنّين حاضرك ومستقبلك، وكن متأكّد أنّ اللي تلمّو بيك مساندينك يقدرو يتلمّو بأيّ كان إذا لقاوه أقوى منّك.. إيّاك ثمّ إيّاك تبيعلهم تونس.. بورقيبة يرحمو عندو عبارة تاريخية : .. ما يصفاوش
الدكتورة نائلة السليني