قالُّو هَيّا نوَلّّيو شُرْفَة.. قالو اسْتَنّى يمُوتُو كبارْ الحُومَة

صباح الخير: تفرجت في اللي صار البارح في التاسعة..وأنا أتساءل هل إنّ التاسعة في حاجة إلى مثل هؤلاء الممكونين بالصراخ والزياط؟ حتى تضمن الأوديمات؟ وهل إنّ الذي توسّط لانتداب هالمدوعو صحفي… عندو فكرة ولو صغيرة شنوّة كان قبل الثورة؟؟؟ تي ماو قالو هيا نولّيو شرفة.. قالو استنى يموتو كبار الحومة..

برامج تلفزية تعمل على تهرئة الأعصاب.. شاركتُ في قنوات عربية عندها اسم وعرفت ما معنى الحرفية: قدر ..رصانة في الحديث.. ويخلّيك المحاور تتمتّع وإنت تتحدّث.. ناس تفهم بعضها وتسمع بعضها..موش يجيبك باش يحصلك ويطيّحلك قدرك..ناقص كان ينحّي صباطو وينزل عليك.. ريتو علاه ولّيت نرفض الحضور في  قنوات اللي مزالت تستدعي فيّة؟ لأنّي صرت خايفة لا نعيش نفس التجربة اللي عشتها في « إ.اف.ام »  مع معزّ التومي وجابلي هاك اللي ما يتسمّاش.. قال شنوّة قال نفلفل في الحصّة .. ثمّ يقطعو التيار الكهربائي للمصعد باش يجبروني ننزل الدروج المتركن ويوفّرو الفرصة لأحد أذرع الجهاز السرّي للنهضة باش يهرسلني ويهدّدني

اليوم في 2018 نحس بعد هالفيديو ما تغيّر شي على 2016.. وتأكدت أنّ إعلامنا إعلام باندية …زوفرة.. خسارة التاسعة كان عندها وجه أفضل من هذا.. لكن اليوم رجعت لخيمة العنف الإعلامي اللي ركزتو النهضة انتقاما لمعارضيها.. أنا متضامنة مع عبير.. ومشاركتها محنتها اللي تعيشها نتيجة العنف اللي تعرضتلو البارح.. وما على التاسعة سوى مراجعة خطها التحريري.. وإلاّ… لكلّ حادث حديث بما أوتينا من جهد… باستا.. يزّي القوّة في النقد موش في السب وتطييح قدر الناس

الدكتورة نائلة السليني