باش نقول كي حبيبي شكري : هُومَا المُجْرمينْ .. سَنُلاحِقُهم… ونُحَاكِمُهم ونُحَاسِبُهم

سبعة سنين لتالي العباد خرجت تنادي بالشغل والحرية والكرامة الوطنية… أكثر من 300 شهيد وآش و2000 جريح مشاو في العفس… وعشرات آلاف المواطنات والمواطنين حياتهم مرّار وهوما يشوفوا في كل حاجة حلوة حلموا بيها تتحوّل الى كابوس… وجيعة… قهرة وغبينة… ياخي الحمد الله اليوم هانا حققنا مطلب هام جداااااا من مطالب الثورة… الكرامة… وموش الكرامة برك… صندوق كامل معبّي معشعش بالكرامة … هاي كعبة الكرامة تسوى مليارات… علاش لا… الكرامة أنواع يا بمبك… وكل واحد وكرامتو… ياخي راهو فرق كبير جدااااااا بين واحد مستعد يموت على خاطر كرامتو وكرامة بلادو ويترزى في عمرو والاّ في ساقو وإلاّ في عينو وبدون مقابل وبين واحد « يناضل » بالماء فرق والتفجيرات وتحويل الوطن الى أمّة… والديمقراطية الى خلافة… ويخلص… يخلص مالراس العالي… يخلص مليارات الدموع والدم… يخلص ماللحم آه لا سامحوني ما عادش فمّة لحم… السرطان وصل للعظم قعد كان المخّ لاباس والقلب حي يدقّ طبول النهاية الآتية لا ريب فيها… مانيش باش نقول كيما درويش « خذوا حصتكّم من دمنا وانصرفوا » باش نقول كي حبيبي شكري : هوما المجرمين .. سنلاحقهم… ونحاكمهم ونحاسبهم

ليلى طوبال